放榜後的選擇
大家都終於攞到自己嘅DSE成績啦，亦代表你完成了中學旅程最後嘅一個歷練。
考得好嘅同學，恭喜你，你嘅努力獲得回報，你已經開始踏上通向成功嘅道路。
考得未如理想嘅，一時失手嘅亦唔代表永遠嘅失敗，來日方長，只要搵啱適合嘅方法，你亦可以踏上成功嘅道路。
無論考得好與唔好，如果啱啱先閃起考慮去海外升學，係呢一刻你除咗要積極搜尋不同的升學出路之外，就係要保持頭腦清晰。
回想起自己A-Level放榜嘅時候，放榜前充滿自信嘅小編，收到張成績單之後，開始懷疑自己個成績未必入到本地大學，唯有臨急臨忙先去參加唔同嘅升學展搵學校。
結果去完升學展之後發現，原來我攞到嘅分數都入到好多唔同嘅外國大學，仲可以揀唔同科讀，但對於原本諗住Jupas派到咩就讀咩，臨急臨忙先開始諗海外升學嘅我，眼見身邊朋友同同學，有啲已經穩入大學，有啲就已經決定去外國讀書，仲話已經準備開始預備整Visa嘅時候，又點會唔心急，所以就求其揀咗一科，跟住個大學排名，順序報咗幾間學校，仲攞埋Offer。
突然之間有學校話收，仲唔同屋企人報喜咩，同屋企人傾嘅時候，原本只係想問佢哋肯唔肯供我去讀，點知佢哋不經意一句:「你諗清楚我聽日就去銀行預備定啲錢 」，反而點醒左我，我自己連讀咩科都未Firm，試問點可能清楚，但係喺果一刻面子問題，又驚無書讀，點都話諗清楚啦。
但係自己就再睇多D關於果幾間學校同學科嘅資料, 之後發現其實我對自己報名果科根本就無興趣，加上我又唔死心放棄JUPAS，最後屋企人話啲錢已經預備好嘅時候，先同屋企人講，都係決定唔去外國讀……住。
結果再過一排, 最後等到Jupas放榜之後嘅再過一排，先至決定去外國讀。
但係喺呢個過程, 我已經知道自己想讀咩科，知道自己揀學校嘅偏好，而唔係只係知道間學校喺邊, 學校General Ranking排第幾。
如果你而家嘅心態好似我以前咁樣， 不妨參考吓我地之前關於留學考慮因素嘅部分，再仔細考慮多啲，先再決定下一步點行。
升學小編L分享
